പണിയെടുത്താലേ പാര്‍ട്ടിയുണ്ടാവൂ…കൂടോത്രം കൊണ്ട് ഒരു കാര്യവുമില്ലെന്ന് യൂത്ത് കോണ്‍ഗ്രസ് വൈസ് പ്രസിഡന്റ് അബിന്‍ വര്‍ക്കി. ”കൂടോത്രം വെച്ചാലൊന്നും പാര്‍ട്ടിയുണ്ടാവില്ല. അതാണ് യാഥാര്‍ത്ഥ്യം. കൂടോത്രം വെക്കുന്നതൊക്കെ എന്ത് പാടാണ്. ഉദാഹരണമായി ഞാന്‍ രാഹുല്‍ മാങ്കൂട്ടത്തിലിനെതിരെ ഒരു കൂടോത്രം വെച്ചെന്നിരിക്കട്ടെ. ഞാന്‍ അദ്ദേഹത്തത്തിന്റെ നാളും, ജനന തിയ്യതിയും മറ്റുവിവരങ്ങളുമെടുത്ത് മന്ത്രവാദിയെ പോയി കാണണം. എന്നിട്ട് എനിക്ക് വേണ്ട രീതിയില്‍ ആ കൂടോത്രം ആക്കണം. അതിന് മന്ത്രവാദിക്ക് എന്താണെന്ന് വെച്ചാല്‍ കൊടുക്കണം. അത് അവിടെ നില്‍ക്കട്ടെ, രാഹുല്‍ മാങ്കൂട്ടത്തിലിനെ തകര്‍ക്കാന്‍ വേണ്ടിയുള്ള സാധനങ്ങള്‍ സുരക്ഷിതമായും രഹസ്യമായും രാഹുല്‍ മാങ്കൂട്ടം ഇല്ലാത്ത ദിവസം അയാളുടെ വീടിന്റെ മതില്‍ചാടി കടന്ന് കന്നിമൂല നോക്കി അവിടെ ചെന്ന് സിസിടിവി മാറ്റി കുഴിച്ചിടണം. അത് കുഴിച്ചിട്ട് ആരും കണ്ടില്ലെന്ന് ഉറപ്പുവരുത്തി രാഹുല്‍ മാങ്കൂട്ടത്തില്‍ നശിക്കുന്നുണ്ടോ നശിക്കുന്നുണ്ടോയെന്ന് നോക്കി ഇരിക്കണം. രാഹുല്‍ എംപിയാണെങ്കില്‍ ഫ്ളൈറ്റില്‍ കയറി ഡല്‍ഹിയില്‍ എത്തിവേണം ഇത് ചെയ്യാന്‍. കെപിസിസി ഓഫീസിലാണെങ്കില്‍ സിസിടിവി മറച്ച്‌ ഭാരവാഹികളുടെ കണ്ണുവെട്ടിച്ച്‌ വേണം ഇത് ചെയ്യാന്‍. ഇത്രയും ചെയ്യുകയാണെങ്കില്‍ ഞാന്‍ രാഹുലിനെ മാറ്റി യൂത്ത് കോണ്‍ഗ്രസ് അധ്യക്ഷനാവും. ഈ പണിയെടുത്താല്‍ മതി. സാധാരണ പണിയെടുത്ത് മുന്നോട്ട് പോകാന്‍ ഇത്ര ബുദ്ധിമുട്ടില്ല. കൂടോത്രം ചെയ്യുന്നവര്‍ ജീവിക്കുന്നത് 2024-ലാണെന്നും ജവഹര്‍ലാല്‍ നെഹ്റുവിന്റെയും പാര്‍ട്ടിയാണ് നമ്മുടേതെന്ന് ഓര്‍ക്കുന്നത് നല്ലതാണെന്നും അബിന്‍ പരിഹസിച്ചു. കോണ്‍ഗ്രസ് അദ്ധ്യക്ഷന്‍ കെ.സുധാകരനുമായി ബന്ധപ്പെട്ട കൂടോത്ര വിവാദത്തിലായിരുന്നു യൂത്ത് കോണ്‍ഗ്രസ്, കുറ്റ്യാടിയില്‍ നടന്ന യങ് ഇന്ത്യ യൂത്ത് ലീഡേഴ്സ് മീറ്റിന്റെ പരിപാടിയിലായിരുന്നു അബിന്‍വര്‍ക്കിയുടെ പ്രതികരണം. കൂടോത്രം വയ്ക്കാന്‍ എടുക്കുന്ന പണിയുടെ പകുതി പണി പാര്‍ട്ടിയില്‍ എടുത്താല്‍ നല്ല നേതാവാകാമെന്നും പരിഹസിച്ചു. കൂടോത്രം ചെയ്യുന്നത് വലിയ ബുദ്ധിമുട്ടുള്ള ജോലിയാണ്. ഇരയായവരുടെ ജാതകവും നക്ഷത്രവും നോക്കി അവരുടെ സാഹചര്യവും സാന്നിദ്ധ്യവും നോക്കി ആള്‍ക്കാരുടെയും ക്യാമറകളുടെയൊക്കെ കണ്ണു വെട്ടിച്ച്‌ താമസസ്ഥലത്തിന്റെ കന്നിമൂലയില്‍ കുഴിയെടുത്ത് വേണം വെയ്ക്കാന്‍. അത്രയും ബദ്ധപ്പെടുന്ന ആ പണി പാര്‍ട്ടിയില്‍ എടുത്താല്‍മതി നേതാവാകാനെന്നും അബിന്‍വര്‍ക്കി പറഞ്ഞു. ഇത് 2024 ആണ്. ജവഹര്‍ലാല്‍ നെഹ്റുവിന്റെയും കൂടി പാര്‍ട്ടിയാണിതെന്ന് കൂടോത്രം ചെയ്തവര്‍ മനസ്സിലാക്കുന്നത് നന്നാവും. കൂടോത്രം ചെയ്തിട്ടൊന്നും കാര്യമില്ല. പണിയെടുത്താലേ പാര്‍ട്ടിയുണ്ടാവൂ, പണിയെടുത്താലെ നേതാവ് ആവുകയുള്ളു.”