രണ്ട് റോള്‍സ് റോയ്സ് വാങ്ങുന്ന പണം ഉണ്ടെങ്കില്‍ നിങ്ങള്‍ക്ക് ഒരു പോത്തിനെ വാങ്ങാം . പറഞ്ഞതില്‍ അതിശയോക്തി ഒട്ടുമില്ല .
ഹരിയാനയില്‍ നിന്നുള്ള അൻമോല്‍ എന്ന പോത്തിന്റെ വില 23 കോടി രൂപയാണ്. 1500 കിലോയാണ് ഇതിന്റെ ഭാരം .
പുഷ്കർ മേള, മീററ്റിലെ അഖിലേന്ത്യാ കർഷക മേള തുടങ്ങിയ പ്രധാന കാർഷിക പരിപാടികളില്‍ പ്രദർശിപ്പിച്ച അൻമോല്‍ ഇന്ന് ഇന്ത്യയിലെ കർഷക സമൂഹത്തിലെ ഒരു വിലപ്പെട്ട കാഴ്ചയായി മാറിയിരിക്കുന്നു. വലിപ്പം, വംശാവലി, പ്രജനന സാധ്യത എന്നിവയ്‌ക്ക് പേരുകേട്ട വർഗ്ഗത്തില്‍പ്പെട്ടതാണ് അൻമോല്‍. ഇന്ത്യയിലെ ഏറ്റവും വിലപിടിപ്പുള്ള പോത്താണ് എട്ടു വയസുള്ള അൻമോല്‍. പുഷ്‌കർമേളയില്‍ ഈ പോത്തിനെ വാങ്ങാൻ നിരവധി പേർ രംഗത്തെത്തിയെങ്കിലും വില്‍ക്കില്ലെന്ന് ഉടമ പാല്‍മിന്ദ്ര ഗില്‍ പറയുന്നു
അൻമോലിന്റെ ദിവസേനയുള്ള ഭക്ഷണത്തിനായി മാത്രം ഏകദേശം 1,500 രൂപ വേണ്ടി വരും. ആരോഗ്യം നിലനിർത്താൻ ഡ്രൈ ഫ്രൂട്ട്‌സും ഉയർന്ന കലോറിയുള്ള ഭക്ഷണങ്ങളുമാണ് നല്‍കുന്നത്. 4 കിലോ മാതളനാരകം, 30 ഏത്തപ്പഴം, 20 മുട്ട, 5 കിലോ പാല്‍, കാല്‍ കിലോ ബദാം എന്നിവയാണ് ദൈനംദിന ഭക്ഷണക്രമം. കൂടാതെ, ഓയില്‍ പിണ്ണാക്ക്, ചെറുപയർ, നെയ്യ്, സോയാബീൻ, ചോളം എന്നിവയും നല്‍കും. കടുക്, ബദാം എണ്ണ എന്നിവ ഉപയോഗിച്ച്‌ ദിവസത്തില്‍ രണ്ടുതവണ മസാജ് ചെയ്ത ശേഷമാണ് കുളി .
അൻമോലിനെ വാങ്ങുന്ന പണമുണ്ടെങ്കില്‍ രണ്ട് റോള്‍സ് റോയ്സ് കാറുകളും പത്ത് മെഴ്‌സിഡസ് ബെൻസ് വാഹനങ്ങളും നോയിഡയില്‍ ഒരു ഡസനിലധികം ആഡംബര വീടുകളും വാങ്ങാം