മലയാളികളുടെ ഇഷ്ടതാരം മല്ലിക സുകുമാരൻ. നടിയുടെ എഴുപതാം പിറന്നാള്‍ മക്കളും മരുമക്കളും കൊച്ചുമക്കളും എല്ലാം ചേർന്ന് ആഘോഷമാക്കിയിരിക്കുകയാണ്.
കഴിഞ്ഞ ദിവസം സമൂഹ മാധ്യമങ്ങളില്‍ ചിത്രങ്ങള്‍ പങ്കുവെച്ച്‌ മകൻ പൃഥ്വിരാജ് എത്തിയിരുന്നു.
ഇത്തവണ പിറന്നാളിന് എങ്ങും പോകരുതെന്നും പിറന്നാള്‍ ഗംഭീരമാക്കണമെന്നും മല്ലികയോട് മക്കള്‍ പറഞ്ഞിരുന്നു. മാത്രമല്ല ദുബായ് ട്രിപ്പ് വരെ കാൻസല്‍ ചെയ്ത് പൃഥ്വിരാജ് വരെ കൊച്ചിയില്‍ എത്തി.
അത് പ്രകാരം കുടുംബസമേതം നല്ലൊരു പിറന്നാളാണ് മല്ലികയ്ക്ക് ലഭിച്ചത്. പിന്നാലെ അമ്മയുടെ സപ്തതി ആഘോഷമാക്കിയതിന്റെ ചിത്രങ്ങള്‍ പൃഥ്വിരാജ് തന്നെയാണ് സമൂഹ മാധ്യമങ്ങളിലൂടെ പുറത്തുവിട്ടത്.
അതേസമയം മല്ലികയ്ക്ക് പൃഥ്വിരാജിന്റെ പിറന്നാള്‍ ആശംസ പോസ്റ്റ് ഇങ്ങനെയായിരുന്നു. “കുടുംബത്തിലെ ഏറ്റവും ഇളയ അംഗത്തിന് ജന്മദിനാശംസകള്‍, എന്നേക്കും 16 വയസ് ആയിരിക്കട്ടെ അമ്മ” എന്നാണ് പൃഥ്വിരാജ് കുറിച്ചത്.
എന്നാല്‍ ഇത്ര സന്തോഷത്തിനിടയിലും ഈ ദിനം സുകുമാരന്റെ ഓർമകളില്‍ വേദനിക്കുകയാണ് മല്ലിക. കാരണം വർഷങ്ങള്‍ക്ക് മുൻപ് മല്ലികയുടെ ജീവിതത്തെ തന്നെ മാറ്റിമറിച്ചതും ഒരു പിറന്നാള്‍ ദിനത്തിലായിരുന്നു.
പ്രണയവിവാഹവും പിന്നാലെയുണ്ടായ പരാജയവും മല്ലികയുടെ ജീവിതം ഇടക്ക് വച്ച്‌ തളർത്തി കളഞ്ഞെങ്കിലും സുകുമാരനാണ് മല്ലികയെ ജീവിതത്തിലേക്ക് കൈപിടിച്ചുയത്തിയത്.
അവളുടെ രാവുകള്‍ എന്ന സിനിമയുടെ സെറ്റില്‍ വെച്ച്‌ സുകുമാരനും മല്ലികയും അടുത്തത്. പിന്നാലെ മല്ലികയുടെ പിറന്നാള്‍ ദിനത്തില്‍ സുകുമാരൻ ഒരു സമ്മാനം കൊടുത്തു.
എന്നാല്‍ ആ സമ്മാനം വാങ്ങുമ്ബോള്‍ മല്ലികക്ക് അറിയില്ലായിരുന്നു, ആ പൊതിയില്‍ വച്ച്‌ നല്‍കിയത് നഷ്ടപ്പെട്ടുപോയ ഒരു ജീവിതമായിരുന്നു എന്ന്. ഒരു ചെയിനും താലിയും ആയിരുന്നു പൊതിക്കുള്ളില്‍. പിന്നാലെയായിരുന്നു വീട്ടുകാരുടെ സമ്മതപ്രകാരം ഇരുവരുടെയും ലളിതമായ വിവാഹം നടന്നത്. ഇന്നും ആ ഓർമകളില്‍ തേങ്ങുകയാണ് മല്ലിക.