കഴിഞ്ഞ 28നാണ് സൂര്യ വിമാനത്താവളത്തില് കുഴഞ്ഞു വീണത്. തുടര്ന്ന് ചികിത്സയിലിരിക്കെ മരിച്ചു. അസ്വാഭാവിക മരണത്തിന് കേസ് എടുത്ത പൊലീസ് ഇവരെ ചികിത്സിച്ച ഡോക്ടര്മാരുടെ മൊഴിയെടുത്തിരുന്നു. യാത്ര പുറപ്പെടുന്നതിനു മുന്പ് ഫോണില് സംസാരിച്ചു നടക്കുമ്ബോള് അശ്രദ്ധമായി ഏതോ ചെടിയുടെ ഇലയും പൂവും നുള്ളി വായിലിട്ടു ചവച്ചെന്നും അപ്പോള് തന്നെ തുപ്പിക്കളഞ്ഞെന്നും സൂര്യ ഡോക്ടര്മാരോടു പറഞ്ഞിരുന്നു. പരിശോധനയില് ഇത് അരളിച്ചെടിയാണെന്നു കണ്ടെത്തി.
ആലപ്പുഴ മെഡിക്കല് കോളജ് ആശുപത്രിയില് പോസ്റ്റ്മോര്ട്ടത്തിനു ശേഷം ആന്തരികാവയവ പരിശോധനയ്ക്കാണു തിരുവനന്തപുരത്തെ ലാബിലേക്ക് അയച്ചത്. അരളിച്ചെടിയുടെ ഇലകള്ക്കും പൂവിനും കായ്ക്കുമെല്ലാം വിഷാംശമുണ്ടെന്നും മരണകാരണമാകാമെന്നും വിദഗ്ധര് ചൂണ്ടിക്കാട്ടിയിരുന്നു. തുടര്ന്ന് പല ദേവസ്വം ബോര്ഡുകളും അരളിപ്പൂ നിവേദ്യത്തില് ഇടുന്നതു നിരോധിച്ചിട്ടുണ്ട്.