കേരള സർവകലാശാല ഉരുള്‍പൊട്ടലുകൾ മുൻകൂട്ടി തിരിച്ചറിയാൻ പ്രത്യേക ആപ്പ് നിർമ്മിക്കുകയാണ്. “SlipK” എന്ന പേരിലുള്ള ഈ ആപ്പ്, മണ്ണിന്റെ കട്ടിയും പ്രദേശത്തിന്റെ നിരപ്പും അനുസരിച്ച് എത്രത്തോളം മഴ പെയ്താൽ ഉരുള്‍പൊട്ടലുണ്ടാകുമെന്ന് മുൻകൂട്ടി തിരിച്ചറിയാൻ സഹായിക്കും.
ഭൗമശാസ്ത്ര ഗവേഷകനും അസിസ്റ്റന്റ് പ്രൊഫസറുമായ ഡോ. കെ. എസ്. സജിൻകുമാറിന്റെ നിർദേശത്തോടെയാണ് ഈ ആപ്പ് നിർമാണം തുടങ്ങുന്നത്. മുൻകാലങ്ങളിലെ ഉരുള്‍പൊട്ടലുകളുടെ വിവരങ്ങൾ അടിസ്ഥാനമാക്കി, മണ്ണിന്റെ ഘടന, ചെരിവിന്റെ അളവ്, മഴയുടെ അളവ് എന്നിവ കണക്കാക്കി, ഉരുള്‍പൊട്ടലിനുള്ള സാധ്യതകളെ കുറിച്ച് മുന്നറിയിപ്പ് നൽകുകയാണ് SlipK-യുടെ ലക്ഷ്യം.
SlipK, മഴയുടെ അളവ് അനുസരിച്ച് യെല്ലോ, ഓറഞ്ച്, റെഡ് അലർട്ട് എന്നിവ നൽകും. ഇതിലൂടെ, അപകടസാധ്യതകൾ മുൻകൂട്ടി അറിയിച്ച് മുൻകരുതൽ എടുക്കാൻ സാധിക്കും.
SlipK-യുടെ അടുത്ത ഘട്ടം, ഉരുള്‍പൊട്ടൽ സാധ്യതയുള്ള തദ്ദേശസ്വയംഭരണ വാർഡുകളിൽ ഓട്ടോമാറ്റിക് മഴമാപിനികൾ സ്ഥാപിച്ച്, നേരത്തെ തന്നെ അപകടസാധ്യതകൾ കണ്ടെത്തുക എന്നതായിരിക്കും.